طريقة عمل كوردون بلو بالصلصة البيضاء + المكونا الشيف حسن ومنال

المقادير: مقدار صدور فراخ سليمه ثمرة بصل مقدار ملح وفلفل وبهارات الفراخ مقدار لانشون مقطع مكعبات مقدار جبنه رومى مبشوره مقدار جبنه موتزاريلا مبشوره مقدار زيتون حلقات
التحضير: يبشر البصل ويعصر ونأخذ الماء الخارج منه ونتبل به صدور الدجاج مع البهار والملح والفلفل

الطبخ: اولا نجيب صدور الفراخ من عند الفرارجي مش متقطعه تكون سليمه

نقطع الصدر نصفين بالعرض بس مش للاخر لا نسيبهم متصلين ببعض
نفتحها وندقها بالشاكوش بتاع البفتيك او بضهر سكينه عريضه
نتبلها بميه بصل وملح وفلفل وبهارات الفراخ
نفرد قطعه الفراخ ونحط الحشو علي الطرف وعليه شويه زتون
تلف كويس قوي مع الضغط زي الرول وتتعمل بانيه في الدقيق والبيض والبقسماط
وتتقلي
 

ملاحظات: - الفراخ البانيه عامه لازم تبات في الفريزر علي الاقل يوم لان الصدور بطبيعتها بتشد لو اتعملت في نفس اليوم
فاحنا لازم نكون حاططينها من قبلها بيوم او اتنين في الفريزر ولما نعملها نطلعها قبلها بفتره تفك
وقبل ماتفك خالص يعني تكون لسه مجمده شويه نفتحها زي مانا موضحه فوق علشان كده بيكون اسهل في التقطيع

2- لازم تتدق كويس علشان ده بيفتت الانسجه وبالتالي تستوي بسرعه وخصوصا ان الفراخ الملفوفه دي بتحتاج سوا شويه زياده عن البانيه علشان قلبها مايبقاش ني

3- الحشو ده حر يعني حسب الزوق والاختيار
ممكن جبن بس ممكن حتي لحمه مفرومه ممكن جبن ولانشون
اللانشون ممكن اي نوع تحبيه انا عن نفسي باحب القشطه جدا طعمها مدخن ورائع
او ممكن قطع بيف مكعبات او ممكن قطع سوسيس
ممكن جبنه كيري ممكن جبن وبسطرمه او ممكن حتي سبانخ
اي حاجه تفضليها وتحبيها اي خليط هاتخترعيه هايمشي بس اللي انا عملته هو ده الاصلي

4- الجبنه الرومي المبشوره لازم تبقي جديده لان ملحها خفيف وبتمط
لكن القديمه طعمها لازع قوي وكمان بتبقي ناشفه مش هاتمط معاكي

5- اللف بقي ده اهم خطوه لانها ممكن تتفتح منك في الزيت وتتبهدل وتبقي مش حلوه في التقديم
لازم وانتي بتلفي تضغطي قوي وتحاولي تلمي كل الجوانب كانك بتعملي ورق عنب
ولو حاسسه انها اتلفت ولسه الشريحه كبيره ممكن تقطعي الزياده وتجمعيهم وتفرميهم وتعملي بيهم اي حاجه تانيه بعدين
المهم ان الشريحه تبقي متناسقه وملفوفه كويس

6-خليط البانيه المقدس عندي هو خليط من الكورن فليكس المطحون والبقسماط الناعم عليهم كيسين من تتبيله اسمها سبايسي واحد حار والتاني عادي
بجد الخلطه دي فظيعه مع اي بانيه انا باعملها بكميات واخد منها

7- القلي بقي مشكله انا جربت كل الطرق وتوصلت لافضل طريقه
الاول كنت باقليها عادي في زيت حامي لحد ماتتقرمش وخلاص بس ساعات كنت بالاقي في حتت نيه ماستوتش وطبعا ده اكبر غلط
طيب مره تانيه قليتها علي نار هاديه جدا علشان تستوي براحتها وتبدا تتقرمش بالتدريج وتكون استوت من جوه
لقيت ان القشره انفصلت واتقطعت علشان نزلت في زيت بارد
اه فعلا الفراخ استوت بس طبعا كان الشكل صعب يتحط قدام ضيوف
المره دي بقي عملت ايه
عملت طاستين واحده غويطه وفيها زيت كتير وعلي نار هاديه
والتانيه طاسه مسطحه وفيها زيت قليل وعلي نار عاليه قوي
الاول قليت الفراخ في الطاسه المسطحه والقشره اتقرمشت في ثواني واتقفلت وبقت تمام من كل الجوانب
وبعدين نقلتها علي الطاسه التانيه الهاديه وسيبتها بقي تستوي علي نار هاديه علشان قلبها مايكونش ني
او ممكن كمان حاجه تانيه تتقلي عادي خالص علي نار متوسطه وتدخل الفرن تكمل سواها
وفي الحالتين ماتتقليش قوي علشان لونها مايغمقش لما تدخل الفرن او لما تتنقل للطاسه التانيه