البوست ده هكتب فيه تجربتي في المانيا من الصفر لحد ما اشتغلت:

البوست اللي بعده ان شاء الله هيكون عن الشغل هنا  بالتفصيل.

اولا انا ما كنتش ناوي اجي المانيا اصلا وبدات في سكة ال USMLE وذاكرت شوية حلوين وظبطت Electives وخدت الفيزا وذاكرت كتير ..

 بس بعد كده واحد صحبي دخل الامتحان وسقط وده احبطني جدا … وده اول واهم درس اتعملته في حياتي … اوعى تخلي حاجة تحبطك … ٩٩ في المية من الناس اللي هتقابلهم او تسمع لهم في مصر محبطين .. انا يمكن احسن حاجة عملتها اني بعدت عن الجروب ده خالص من اول ما بدات امشي في سكة المانيا وده اول بوست ليا هنا من سنتين … اولا كل واحد وليه تجربة … ثانيا اكيد المشوار فيه مطبات كتير .. المشكلة ان ما حدش بيكتب غير اللي في مشكلة وبيدور لها على حل وده يخليك متخيل ان الناس كلها في مشاكل واللي تعبان في الفيزا واللي اترفض في وظيفة واللي مش عارف يتعامل في المواصلات وهكذا .. اللي ما تعرفوش ان بعد كده كله بيتحل وربنا بيكرم اوي والله … بس اللي بيعافر وما يخافش … انا في ناس بدآوا معايا الالماني من ٣ سنين وكانوا ماشيين تاتا تاتا وكل شوية يوقفوا وبعدين يسمعوا ان واحد اشتغل فيذاكروا شوية وبعدين يسمعوا كلام تاني فيقفوا وكل ٦ شهور حد فيهم يكلمني يقول لي هي المانيا قفلت فعلا ولا لسه في فرصة !!!! الحل كله في (انا لا نضيع اجر من احسن عملا ) … اعمل اللي عليك بس كويس وما لكش دعوة .. ربنا ما بيضيعش تعب حد … فكر الاول انت عايز تعمل ايه .. بتدور على ايه.. اوزنها من كل النواحي … بس اول ما تاخد القرار يبقى (اذا عزمت فتوكل )
س: المانيا قفلت ولا لسه عايزة ناس؟
 ج: المانيا عايزة ناس فوق ما تتخيل .. في كل التخصصات … ايوه في كل التخصصات .. بس هما دلوقت اقتنعوا انهم يسيبوا الوظايف فاضية احسن من انهم يعينوا دكتور لغته وحشة.. في اقسام كاملة بتقفل عشان مش لاقيين دكاترة و Hebamme .. بالنسبة لهم ده احسن من ان عيان مثلا يرفع قضية بعد كده عشان الدكتور فهمني غلط ويخسرهم مبلغ وقدره .. الفرص كمان مش زي الاول عشان الدكاترة اللي بييجوا المانيا فعلا من كل العالم .. روسيا واوكرانيا والهند وسوريا وليتوانيا وكولومبيا والارجنتين و بولندا (دول اللي معايا في القسم بس ) .. وبالتالي المنافسة اكتر. بس لسه لحد دلوقت المقياس اللي بيفرق بين حد وحد هو اللغة.. بمعنى كل ما كانت لغتك احسن .. كل ما كانت فرصة انك تشتغل في التخصص والمكان اللي نفسك فيه احسن .. ثم الخبرة في المانيا ثم الخبرة برة المانيا.. وقبل كل حاجة طبعا توفيق ربنا .. طبعا انت مش هتيجي من بيتكوا على وظيفة في مستشفى تعليمي.. بس لو عايز هتوصل .. برضه ربنا خلق الدنيا في ست ايام
 المهم يعني انا بدات اخد الماني وانا في امتياز .. اهم نقطة .. في ناس عايزة تسافر امريكا بتذاكر ليل ونهار لمدة سنتين على الاقل وتدفع فلوس قد كده .. اللي عايز يروح انجلترا بيعمل بلاب وبرضه بيتفحت مذاكرة .. اكيد يعني لو عايز تدخل في واحد من احسن الانظمة الصحية في العالم وقالوا لك كل المطلوب منك اللغة انك تحط نفس المجهود اللي كنت هتحطه في ال USMLE مثلا في اللغة … الموضوع ده بيغيظني جدا اني الاقي ٩٠٪ من اللي ماشيين في سكة المانيا بيتعلموا اللغة حاجة by the side كده .. يعني شغال في الحكومة والبرايفت وبيعمل ماستر وبياخد الماني !!! ما جعل الله لرجل من قلبين في جوفه .. انا يمكن يكون احسن قرار اخدته لحد دلوقت اني الحمد لله ما قدمتش في التكليف اصلا .. لو انت لسه ما بداتش يبقى فكر انك ما تدخلش في التراك المصري من اساسه .. كل ساعة فيه مش بس بتضيع من عمرك .. ده انت كمان بتبوظ مخك وتفكيرك كدكتور وتعاملك مع المرضى .. انا مش باقول لك استقيل .. انت حر .. بس ما تاخدش الالماني حاجة جانبية … ذاكره كانه معادلة اجنبية بالظبط ..
المهم يعني مذاكرتي كانت ازاي .. انا قعدت اذاكر على الاقل ٨٨ ساعات يوميا لمدة سنة.. الكورس كان دوره اقل من ١٠ ٪.. انا بدات في ADK في مصر الجديدة .. بس انا كنت بذاكر كله مع نفسي والكورس كان مجرد تغيير وقت .. النت ملياااااان material للي عايز يذاكر .. من قبل ما ابدا نزلت Application على الموبايل اسمه Babel .. ده جامد جدا جدا جدا لحفظ الكلمات … ايوه سعادتك لازم تقعد وتحفظ كلمات .. وكل ما تحفظ اكتر كل ما حصيلتك اللغوية تكتر .. الالماني فيه ميزتين مش في اي لغة تانية .. اولا ان الكلمة زي ما بتتكتب بتتنطق .. مش زي الفرنساوي مثلا نص الكلمة ما بيتنطقش .. الميزة التانية انك بتلزق الكلمات في بعض بيعملوا كلمة جديدة .. ممكن تشوف كلمة من ٨٠ حرف وتفهم بالظبط معناها ايه عشان انت عارف كل جزئياتها .. انا حفظت حوالي ٤٠٠٠ كلمة .. انت بعد ٥٠٠ كلمة هتهرش السنس بتاع اللغة .. هتحس ان الكلمة ده غالبا كده معناها كذا .. الكلمة ده اكيد المقصود بيها كذا .. كمان في مقاطع كتير متكررة .. بس .. دوس كتير وهتهرش ..
مع الكلمات ابدا ذاكر الجرامر .. طبعا البوب اللي المفروض تسمعه هو البرنس Michael Thomass… في كتب كتير جدا بتشرح بالانجليزي .. German essential grammer ومجموعة practice makes perfect…لو عايز مرجع تفهم جزئية معينة يبقي Hammers. برضه النت مليان واللي بيدور بيلاقي
لازم  تقرا كتيييير .. ده اهم حاجة في الليلة كلها .. اقرا اي حاجة .. انت بتقرا كلام فاضي كتير كل يوم .. خليه بالالماني.. شوف بتحب تقرا ايه واقراه بالالماني. .. اخبار كورة .. افلام .. اخبار.. اي هري .. واوعي وانت بتقرا تحاول تدور على معنى كلمة مثلا .. كده هتقف كل ١٠ ثواني وهتزهق … انت بتقرا عشان تفهم ١٠٪ بس من اللي بتقراه .. بكره هيبقوا ٢٠٪ .. وبعده ٣٠ وهكذا ..
….
 لاااازم تسمع كتيييييير…. كتير يعني كتير … انا كنت بتمشى كل يوم ساعتين وبسمع بس .. في حاجات ال DW من اول A1.. كمان Slow German حلو .. وده واحدة بتتكلم بالراحة .. في كمان Learn in your car German..مش مهم تسمع ايه ومين وفين .. المهم اسمع كتير ..انت لو في مصر فده معناه ساعات في العربية او في المواصلات يوميا ..اسمع قبل ما تنام .. اسمع وانت نايم .. اسمع مش عشان تفهم .. ما تحاولش اصلا تفهم او تعصر مخك وتركز .. ريلاكس .. اسمع عشان مخك يشرب اللغة .. انت اتعلمت لغتك الام بالسمع اصلا ..
بس يا سيدي .. انا عملت كده وانا في مصر .. بعد ما خلصت A1 امتحنت A٢٢ على طول .. وبعد شهر امتحنت B1.. وبعدين روحت جوته اخدت فيه B2.. والحمد لله كنت احسن بكتير من مستوي الكورس .. بعد ما خلصت ما رضيتش اسافر المانيا على طول .. في مرحلة كده بعد ما توصل لها هتحس انك عايز تكمل في تعلم اللغة وانت مبسوط كده .. بعد ال B2 ذاكرت برضه مع نفسي و بعد شهر امتحنت C1 والحمد لله جبت ٩٤ ٪.. اه قبل ما انسى كل اللي فات ده كان مذاكرة اللغة عامة .. في مذاكرة للامتحان وده حاجة تانية خالص .. عشان الامتحان في حد ذاته ضغط وسترس وانت بتنسى كل حاجة حتى لو الامتحان بالعربي .. فمذاكرة الامتحان ده انك تقعد تحل امتحانات.. في كتب كتير ونماذج برضه على النت ..،بعدين هتعمل اسطمبه كده لل schreiben تخش ترزعها وتزود عليها بس كام نقطة من الموضوع اللي جاي لك .. وشرحه في ال sprechen.. اسطمبة وخش ارزعها .. وما تقلقش .. قلنا ربنا ما بيضيعش تعب حد ..

قبل ما اكمل عايز اقول اني فضلت في مصر اذاكر حتى بعد ما خلصت C1.. بدات اذاكر Medicine ..واذاكر لامتحان Telc medizin ..( كان في بوست تفصيلي كنت كاتبه عن الامتحان ده والاستعداد ليه ) .. الفكرة انك تيجي المانيا جاهز على قد ما تقدر عشان هنا انت لوحدك في بلد جديدة وناس غريبة وكده كده في صدمة لمدة شهرين على بال ما تبدا تفهم انت فين وبتعمل ايه .. فتعالى جاهز عشان الوقت هنا في الاول لحد ما تظبط وضعك ضغط عصبي ومصاريف وبالتالي مش هتكون رايق تذاكر بروقان .. الحاجة التانية انك غصب عنك هتستسهل وتتكلم عربي او انجليزي .. ٩٠ ٪ من العرب اللي بييجوا يتعلموا لغة هنا بيخرجوا مع صحاب عرب وبيشتروا اكل من محلات عرب وما لهمش اي احتكاك بالمان ..

..
 بس يا سيدي .. وانا في مصر قدمت على هوسبيتاتسيون وجالي في جامعة هايدلبرج .. وبعدين قدمت على فيزا بحث عن عمل .. وجيت المانيا … انا جيت طبعا نزلت الهوسبيتاتسيون وحاسس ان انا حاجة ..وحياتك طور الله في برسيمه !! عادي .. ولا تتهز .. انا يا عم كنت امتياز في الدمرداش باخد الايس بوكس واروح بنك الدم احضر دم وازوغ ساعتين واقعد على القهوة والعب ماتشين .. الاقي هنا النايب بيسحب الدم ويحط الانبوبة في فتحة في الحيطة وهي تمشي جوه tunnel system لحد ما توصل للمعمل !!! المهم يعني فضلت معاهم اسبوعين في الهوسبيتاتسيون .. وانا في مصر كنت حاجز معاد لامتحان التلك ميديزين بعد ما اوصل المانيا بتلت اسابيع .. والحمد لله امتحنت و نجحت ..
 بعديها قدمت على الابروباتسيون في مونستر .. عشان عين شمس كانت ساعتها بتاخد جلايش هناك .. وقالت لي ان الموضوع هياخد شهرين تلاتة .. انا لحد ساعتها بصراحة ما كنتش عارف انا عايز تخصص ايه .. كنت حابب النسا في الكلية بس شهرين الامتياز بتوع الدمرداش كرهوني فيها .. الفترة اللي كنت مستني فيها ورق الابروباتسيون بدات اذاكر لامتحان ال Fachspracheprüfung.. حصل لي ساعتها ظروف واضطريت اسافر الامارات ..وفضلت هناك حوالي شهرين .. المهم رجعت المانيا وكان فاضل في الفيزا شهر.. والفيزا ده وحشة جدا جدا عشان ما بتتمدش ولا بتتجدد بتاتا.. ده نص في القانون بتاعها للاسف … كان المفروض في خلال الشهر ده اخد جلايش واحجز الامتحان واطلع الابروباتسيون وادور على شغل في التخصص اللي انا لسه مش عارفه واطلع البلاوا كارته واشتغل :D :D :D نقول تاني .. انا لا نضيع اجر من احسن عملا..  روحت للست اللي بتتابع ورقي في مونستر،.. لقيتها لسه ما طلعتوش من الفايل اللي انا باعته فيه اصلا .. رغيت معاها شويه وكانت مستغربة اني بتكلم الماني كويس .. الحمد لله بعد اسبوع بعتت لي النتيجة اني جلايش ولازم احجز الامتحان .. حجزت الامتحان وكان اول معاد بعد ٣ اسابيع .. يعني بعد ما الفيزا تخلص باسبوع .. روحت ال Ausländerbehörde اشرح لهم الموضوع .. قالوا لي انسى.. قلت لهم ده انا حاجز الامتحان قالوا لي اكتب طلب رسمي بمد الفيزا وهنرد عليك بجواب رسمي بالرفض عشان ده قانون الفيزا بس لحد ما نرد عليك هنطلع لك Fiktionsbescheinigung ساري لحد ما ييجي لك منا الرفض رسمي.. وساعتها لازم تمشي في خلال يومين .. طبعا انا كده رقصت على السلم ولا طولت ابروباتسيون ولا شغل .. قلت اعمل اللي عليا واذاكر للامتحان وربنا يسهل .. وكل ده قاعد مستني جواب ان الفيزا مش هتتجدد ولازم امشي والا هبقى قاعد مخالف وكاسر الفيزا وده معناه مش هاجي المانيا تاني.. المهم الجواب ما جاش !!!! وانا روحت امتحنت والحمد لله نجحت وقالوا لي هنبعت لك الابروباتسيون في خلال اسبوعين .. قلت لهم لا ده انا اصلا فيزتي خلصت الاسبوع اللي فات .. سبحان الله برضه ادوني Bescheinigung اني نجحت ورجعت بيها على مونستر وادتني الابروباتسيون في نفس اليوم .. رجعت على الاوسلاندربيهورده بقول لهم انتوا نسيتوني ولا ايه يا جماعه :D لقيت الموظفة بتقول لي انا بعتت لك جوابين برفض الفيزا ولزوم المغادرة  والاتنين رجعوا لي تاني !!!! وده حاجة شبه مستحيلة في المانيا !! طلعت الحمد لله ناقلة العنوان بتاعي غلط من الملف على الظرف !!!! الحمد لله يعني !!! المهم قالت لي هتبعت لي جواب تاني بالعنوان الصح والفيكسيون اللي معايا ده ساري لحد ما الجواب يوصل. يعني يومين بالكتير ولازم امشي … الحمد لله كان معايا ابروباتسيون و سي ١ وتلك ميديزين وفاخشبراخابروفنج .. ربنا يسر لي شغل عن طريق واحد .. في مستشفى علاج طبيعي كده وقبلوني بالتليفون وروحت في نفس اليوم مضيت العقد وروحت تاني يوم طلعت البلاوا كارته .. انا بحكي كل ده عشان اقول لك انك لو كويس ولغتك حلوة ربنا هيكرمك وهتلاقي شغل هوا .. اول وظيفة ده كانت في مستشفى تعبانة في هيسين .. انا اتفقت معاهم اني هفضل معاهم ست شهور .. كان هدفي فيهم اهرش السيستم هنا ( في حاجات كتير لازم تتعلمها وتفاصيل مش موجودة في الكتب .. مثلا ال Private Patienten, Codierung, Op-Berichte, Dienstanweisungen, وكمان اتكلم مع العيانين كتير واذاكر طب (ساعتها بقة كنت خلاص قررت اني اخد نسا ) واخد رخصة السواقة (وده فيلم اصعب من الابروباتسيون سعادتك .. انا معايا رخصة من الامارات ومصر وامريكا وهنا سقطت ٣ مرات ) .. الحمد لله بعد ٦ شهور سبتهم وجيت المستشفى اللي انا فيها دلوقت..
 كفاية كده .. البوست الجاي ان شاء الله عن الشغل هنا ازاي ونظام المستشفى وتعمل ايه .. البوست ده كان بس عن البدايات.. حبيت اقول ان اللي بيتعب بيوصل .. الماتيريال اللي ذاكرت منها اغلبها نزلتها من على جروب اسمه تعلم اللغة الالمانية ..
لو البوست ده فادك
 #افتكرني_بدعوة_حلوة 

المصدر : Mohamed Ismaeil