ازاي تعيش شهر في دبي بقل تكلفه ممكنه

ازاي تعيش شهر في دبي بقل تكلفه ممكنه
شايف بوستات الناس الي بتحكي تجاربها و حبه تفيد الناس الي عايزه تسافر فحيبت اشارك و افيد زي ما بستفيد
احلي حاجه في دبي انها بتجمع ما بين حاجتين

لو انتا عايز بلد فيها ناس بتتكلم عربي هتلاقي و حاجات تناسب ثقافتك متقلقش من اللحم المذبوح حسب الشريعه و لو عايز تعييش مع جنسيات كتيره من العالم في نفس المكان هتلاقي بردو
اولا لازم تحدد هدفك انتا نازل دبي ليه نازل سياحه ولا بتدور علي شغل زي ما فيه مصريين كتير حدا بيعملوا كده
و انا كنت منهم ولا نازل سياحه مع نفسك و اصحابك
ولا نازل انتا و اسرتك لان ديه بتفرق في تكلفة الفرد بشكل غير عادي
هتكلم عن نفسي انا كنت نازل ادور علي شغل لمدة شهر
اولا : السكن
السكن ده في دبي الي تقريبا ممكن تصرف فيه من 25 % ل 33% من الفلوس الي معاك في الرحله كلها فلازم تبقي ظابط نفسك فيه كويس اوي
انا كنت محظوظ جدا لاني لقيت ناس ساعدتني اني اقلل التكلفه ديه و تقريبا قعدت ب450 درهم طول الشهر (ده بسبب الي اعرفهم مش شطاره مني)
مستويات الاماكن الي بتقعد فيها المكان و بعده عن قلب البلد هي الي بتحدد الايجار يعني
*بردو فيه فرق انتا هتقعد مع هنود ولا فلبنيين ولا عرب و هل دول عمال ولا موظفين لان ده بيفرق في نضافه السكن و ريحته متستغربوش
مثلا
1- انتا هتقعد جنب المطار في منطقة اسمها ابوهيل و ديه انا ارشحها جدا لانها فيها مطاعم مصريه و فيها مصريين كتير و حتي القهاوي الي هناك فيها مصريين شغلين فيها و شغاله للصبح
ديه فيها من 800 درهم الي1200 درهم في الشهر في السرير الواحد و التفاويت ده حسب معاك كام واحد في الاوضه
(انا كنت قاعد في اوضه فيها 5 سراير حالة السكن متوسطه ب 1000 درهم)
2- عندك حته اسمها النهده ديه قريبه من ابو هيل بردو و علي حدود ما بين دبي و الشارقه كان فيها سكن ب 750 بس الي كانو هناك قالولي السكن حالته تعبانه
3- عندك حتت بقي ظيه ممكن تقول عليها دبي الجديده زي حته اسمها البرشاء ديه جنب مول الامارات في اخر البلد بينها و بين المطار تقريبا ساعه الاربع بالمترو منطقه جميله جدا و جنبها فنادق كتير و قريبه من برج خليفه مول دبي و في وش فندق برج العرب بس عيوبها انها غاليه نوعا ما بتبتدي من 1000 و انتا طالع و تبقي نايم علي سرير دورين تبقي في الدور التاني مثلا زي سراير المساجين كده الاوضه فيها 6 معاك بس كلها مباني جديده و ممكن تبقي ب1500 ويبقي فيها جيم و حمام سباحه تبقي البنايه (هما بيقولوا علي العماره بنايه هناك) و مفيش جنبك تقريبا اي مطعم مصري او عربي او انا مشفتش غير ابن حميد بتاع السمك الي في اسكندريه بس تخيل ده هناك يبقي بكام الوجبه بقي
4-عندك دبي مارينا و الجميرا و ديه الدلع كله بقي فيها ناس حكتلي انها كانت ساكنه في الدور ال50 او30 مش فاكر بالظبط و شايف البحر و جيم ببلاش و حمام سباحه و جنبك شاطئ الجميرا من اروع الاماكن في دبي و علي فكره كل الشواطئ ببلاش في دبي الا الممزر بس ب 5 درهم 😂😂 بس ديه هتبقي من 1500 و ممكن تلاقي 1200 بس قليل جدا و لحد ما انتا عايز بقي نقول مثلا9000 درهم كويس 😁😁 الي هي بتبقي علي بحيرات الجميرا و بتبقي حاجه اسمعا سكن فندقي يعني ناس بتيجي تنضف الاوضه كل يوم و كده و ده بشكل عام في كل السكن الي انا شفته بس ديه احسن شويه
خدع بقي و اشتغلات متدخلش فيها
*حد يقولك هات تامين اي مبلغ حتي متدفعش و لو وقفت عليه شوف مكان تاني علشان ديه لو انتا ماشي كمان شهر هتدفعه ليه و هيدوخك لما تيجي تقوله رجعه قبل ما تمشي و هتضطر تسيبه و تسافر علشان تلحق الطياره و يفقوا راحوا عليك
متدفعش الا في حالة انك هتقعد مده طويله اكتر من 3 شهور مثلا انا حصل معايا الموقف و ليه 300 درهم حتي الان و ربنا يعوض عليا
* اشتغاله تانيه لما يوقولك السكن ده من غير dewa و نت تفكك منه بردو (الديوا ديه هي اختصار كلمه هيئة مياه و كهرباء دبي) لانك هتدفعهم لوحدهم و هيتقسم عليك وعلي الي موجودين معاك و الكلام ده غالي في دبي
*اشتغاله تالته اسكن في الشارقه علشان ارخص ديه بقي حق يراد بيه باطل زي ما بيقولوا ليه هي هناك ارخص هتلاقي ب 750 و اقل كمان و انتا و واحد بس في الاوضه بس ديه هتلبسك في حاجه تانيه المواصلات بالرغم ان دبي و الشارقه تقريبا مدينه واحد ما بينهم كوبري بسه اسمه الوحده الا انك هتلبس في مواصلات ملهاش حل يعني هتاخد نواصله توديك من مكانك في الشارقه ل موقف الجيبل ده موقف الشارقه ادي فلوس و هتاخد من الجبيل حاجه لدبي ب 10 درهم ادي فلوس تانيه و تشوف بقي انتا عايز تروح فين في دبي و ادي فلوس تالته و المواصلات في دبي غاليه هتكلم عليها في جزء لوحده
و غير كده انتا هتبقي متقيد بقي في دبي ليه اولا مش هتعرف تروح تريح و تنزل تاني ثانيا لازم تتحرك من اي مكان انتا فيه و تبقي في موقف الاتحاد او الراشديه الساعه 10.30 لان ده اخر اتوبيس بيروح الشارقه و لا هتبات في الشارع لحد الصبح او تاخد تاكسي من دبي للشارقه و ديه خطوه انا لو هبات في الشارع مش عملها لانها بالميت ب 100 درهم و دول ممكن تتغدي بيهم 4 ايام
فيه اماكن كتير للسكن في دبي بس دول الي جربت او سمعت من مصدر موثوق فيه الكلام ده و اسف علي الاطاله
الموضوع مكتوب من Ahmed Raafat من صفحة اسرار السفر