ده دليل شامل لسفرك شرم الشيخ كل المعلومات الي هتحتاجها

اولا الاقامة فى شرم الشيخ ممكن تكون:

1- فندق وبتختلف مستويات الفنادق من اول 3 نجوم ولحد 5 نجوم ديلوكس
2- شاليه او ستوديو وده الاختيار الاقتصادى

**بتتقسم شرم الشيخ لخلجان او مناطق رئيسية تقدر تختار اقامتك فى اى منهم على حسب احتياجاتك من السفرية لان كل منطقة فى شرم تتميز بشوية حاجات
- خليج نعمة الاشهر فى شرم الشيخ وهو الاكثر طلبا من الزائرين المصريين او حتى الاجانب اى فندق او شالية فى خليج نعمة هيسمحلك انك تقدر تنزل فى اى وقت تتسوق او تستمتع باى كافيه او مطعم او حتى تنزل البحر الخاص بالفندق او خارج الفندق عشان فى اكتر من شاطئ على الخليج وبيتميزوا بنعومة الرمل ويتوفر هناك كل الالعاب المائية
- هضبة ام السيد وهى الجزء المرتفع فى شرم الشيخ ودى اللى بيلجألها الزوار فى حالة درجات الحرارة العليا لانها بسبب الارتفاع تعتبر جوها اهدى شوية من بقية شرم الشيخ
- خليج القرش واتسمى بالاسم ده بسبب وجود قروش فعلا فى المكان ده من فترة طويلة لكن دلوقتى مش موجوده والفنادق الموجوده على خليج القرش كلها بتتميز بوجود الشعب المرجانية فى الشواطئ الخاصة بيها وقريب من خليج القرش منطقة سوهو سكوير وهى منظقة تجمع كافيهات ومطاعم مختلفه من اكبر البراندات اللى موجوده فى شرم الشيخ
- خليج نبق وهو المنطقة الاكثر طلبا من حديثى الزواج بسبب هدوء المكان وروعة المناظر تحت الماية من شعب مرجانية واسماك وكمان معظم المنتجعات على الخليج ده مهتمه براحة العميل وتوفير كل حاجة يحتاجها بعيد عن دوشة وزحمة خليج نعمة

ثانيا الانتقالات الى شرم الشيخ:

1- لو هتسافر من القاهرة او اى محافظة مركزية هتلاقى شركة نقل سياحى بسهولة زى جو باص او سوبر جيت او شرق الدلتا ....
2- طيران من القاهرة او الاسكندرية (برج العرب) او اسوان او الغردقة
ثالثا الانشطة والرحلات اللى ممكن تعملها وانت فى شرم:

1- الرحلة البحرية هى الرحلة الاشهر والاكثر طلبا بين الرحلات الداخلية فى شرم الشيخ تتحرك يوميا مراكب النزهة من جميع انحاء شرم الشيخ لتبحر بيك فى البحر الاحمر ويتكون البرنامج من الوقوف مرتين او تلات مرات فى البحر فى اماكن مميزة للسنوركلينج وممكن تعمل دايفنج لو حبيت وبتكون الرحلة شاملة وجبة الغداء وبيبقى معاكم غطاس محترف على المركب عشان يساعد الناس فى نزلات السنوركيلنج.
2- المنصب التانى فى الرحلات الاكثر طلبا بيجى من نصيب رحلة السفارى وليها اكتر من شكل السفارى ب بيتش باجى والسفارى بعربيات رباعية والرحلة بتكون سفارى بس بين الجبال فى الشروق او فى الغروب وممكن تكون سوبر سفارى وبعد الرحلة بالبيتش باجى فى الجبل تحضر حفل عشاء بدوى
3- من اهم الاماكن اللى ممكن تزورها فى شرم الشيخ هو السوق القديم وهو مش بعيد عن خليج نعمة حوالى 10 - 15 دقيقة هتلاقى هناك محلات بيع الهدايا ومطاعم السمك زى مطعم فارس الاشهر فى شرم الشيخ واماكن السهر والكافيهات المميزة
4- عروض الف ليلة وليلة من اقدم العروض فى شرم الشيخ لكن مازالت محافظة على مكانها وسط الانشطة المختلفة جدا وهى تناسب الافراد والعائلات
5- عرض الدولفين وبيعجب الاطفال والكبار جدا
6- الالعاب المائية بجميع انواعها ممتعه جدا فى شرم الشيخ زى (بنانا بوت - سبيد بوت - جلاس بوت - براسيلينج - بدال)
7- السهر والنايت لايف واخدين حقهم جدا فى شرم الشيخ فى كل مكان هتلاقى اماكن السهر موجوده اشهرهم (Space - Le Pasha - HardRock - Cocco Beach - Terrazina Beach - VIP club - Budah Bar - كافية فرشة - سوهو سكوير - خليج نعمة - السوق القديم)
8- لو اقامتك فى مكان مفيهوش اكوا بارك هتقدر تعوض ده فى يوم كامل تقضية فى اكوا بارك سيتى او كليو بارك واولادك هيبقوا مبسوطين باليوم ده جدا
9- شاطئ الفنار يعتبر من افضل اماكن الغطس والسنوركلينج فى شرم الشيخ لو بتحب العوم وسط الاسماك والشعب المرجانية لازم تزور شاطئ الفنار
10- هوليود من الاماكن العريقة فى شرم الشيخ وهو ايضا تجمع للكافيهات والمطاعم هناك هتلاقى النافورة الراقصة و حديقة الديناصورات ممكن تاخد معاها صور حلوة جدا
11- لو عندك استعداد تخرج بره شرم الشيخ عشان تقضى يوم كامل فى مكان جديد عندك اختيارات كتير اهمهم واللى بتسحر كل اللى بيروحها محمية راس محمد من وجهة نظرى الشخصية افضل مكان تعمل فيه سنوركلينج فى مصر بعد مرسى علم وكمان دهب على الرغم انها محتاجه رحلة لوحدها لكن يوم هناك هيفى بالغرض وتقدر تلفها كلها لو مسافر فى الشتاء اكيد مش هتفوت تسلق جبل موسى (المعروف بجبل سانت كاترين لكنهم مختلفين)
الكاتب : Ahmed Shabiek‎