ايه قصة الزماله والبورد والماستر اللي بيقولوا هيلغوه ده.

دلوقتي احنا مش فاهمين حاجه... ايه قصة الزماله والبورد والماستر اللي بيقولوا هيلغوه ده... وايه موضوع البورد العسكري... نروح فين ونيجي منين؟؟؟ طيب... في البوست ده هاحاول أجاوب علي الاسئله اللي ناس كتير بتسألني فيها...

ومن خلال المعلومات المؤكدة لحد دلوقتي في النقابه... عشان نشوف ممكن نعمل ايه ونفهم سوا... ركز دقيقتين معايا:
جري العرف في النظام التعليمي الطبي في مصر يمكن من الستينات مثلا أن الناس بتترقي وت upgrade في ال career بتاعها بالشهادات الأكاديمية (الدبلومه والماجستير والدكتوراه)... وزمان كان يكفي انك يبقي معاك دبلومه عشان تبقي برنس... دكتور متخصص وتفتح عياده وتشتغل كويس أوي وتكمل ال 5 عين العربيه والعماره الخ...
مع الزمن بدأ قيمة الشهادات ديه تقل...مع زيادة عدد الخريجين وتدهور التعليم الطبي عموما... ده غير ان الدول اللي حوالينا اخدت مجري مختلف... الترقيات وال upgrade بالشهادات التدريبية (الزماله والبورد)... ووصلنا لحد دلوقتي أن مصر تقريبا البلد الوحيده اللي لسه شغاله بالشهادات الأكاديمية... حتي السودان بقي عندها البورد بتاعها ومش عايز اقولك أن البورد السوداني شهاده محترمه وقويه .
بناء علي ما سبق كان فيه اتجاه في الدوله أنهم يطبقوا النظام ده... اللي عايز يشتغل كلينيكال يعمل زماله (او بورد)... اللي عايز بقي يعمل ماجستير او دكتوراه براحته بس يبقي عارف أنها شهادات بحثيه يعني تشتغل بيها بحث علمي (زي أحمد زويل كده)... لكن تشتغل كلينيكال يبقي لازم شهاده تدريبيه
الاتجاه ده كان من قبل 25 يناير وكان الوزير السابق د حاتم الجبلي علي وشك تطبيقه... بس قيام الثوره وسقوط النظام عطل الموضوع ووقفه... دلوقتي الموضوع ده رجع وبقوه وواضح أن فيه اتجاه عام في الدوله انه يطبق وباقصي سرعه واللي يأيد الاتجاه ده مجموعه من القرارات صدرت الفتره اللي فاتت:
1 - قرار رئيس مجلس الوزراء بإنشاء الهيئة المصريه للتدريب الإلزامي... وديه بدأت شغل فعلا واتشكل مجلس إدارتها... ولو تفتكروا في مقابله ليها مع رئيس الجمهوريه وقالوا أن أول دفعه سنة 2020
2 - قرار نقابة الأطباء بترقية الحاصلين علي الزماله لدرجة استشاري بعد مرور فتره وبكده الزماله تبقي شهاده منتهيه يعني مش محتاج تاخد معاها حاجه تاني
3- موضوع البورد العسكري وأن كان لسه منزلتلهوش لايحه واضحه بس غالبا خلال 6 شهور هتكون نزلت لأنهم ناويين يقبلوا أول دفعه في يناير اللي جاي
طيب نفهم من كده ايه... نفهم أن ده اتجاه عام للدوله... وخلال فتره قليله هيبقي الماجستير والدكتوراه لأعضاء هيئة التدريس بس... واللي عايز يعملهم من خارج الجامعه مفيش مشكله بس يبقي عارف أنه مش هيشتغل بيهم كلينيكال لازم زماله او بورد مصري
كده نبقي استوفينا النقط المهمه... تعالوا بقي نشوف الاسئله اللي بتتردد كتير وناس بيسألوني فيها
س: انا لسه ها قدم علي نيابه وقدامي ماستر وزماله اخد انهي؟؟؟
ج: زماله طبعا قولا واحدا... لأن الزماله دلوقتي تديك استشاري لكن الماستر آخره أخصائي
س: طيب انا تخصصي مش نازل في الزماله او قدمت وما اتقبلتش... اعمل ايه؟؟؟
ج: قدم ماستر وخلاص... بس خلي بالك الماستر دلوقتي اخره أخصائي يعني لازم بعده يا تكمل زماله وترجع لنفس النقطه يا تعمل دكتوراه
س : انا خايف أقدم زماله او ماستر وما اتعلمش حاجه؟؟؟
ج: ده أهم سؤال... مصر اصلا خارج تصنيف التعليم الطبي... فلو انت فاكر انك بشهادة هتاخدالعلم بالمعلقه تبقي غلطان... عشان تبقي كويس اشتغل علي نفسك... ذاكر خد كورسات أحضر مؤتمرات... والشهادة عامل مكمل مش هي الأساس عشان تبقي كويس او وحش
س: ايه موضوع بورد الجيش ده؟؟؟
ج: ديه شهاده هتبقي تبع الأكاديمية العسكريه... لسه لحد دلوقتي منزلتش ليها لايحه عشان كده مفيش عنها تفاصيل كفايه... بس همه قالوا في القرار بتاعها أنها ترقي اخصائي وتعادل بدكتوراه لو عملت رساله... وبكده تبقي شهاده كويسه جدا وانا أنصح بيها أي حد عنده فرصه انه يقدم فيها لأن الحاجات ديه مع الوقت بتبقي اصعب زي الزماله زمان كانت مش لاقيه حد شوف دلوقتي الحرب عليها... ده غير ان بغض النظر عن أي اسقاطات سياسيه ختم الجيش علي شهاده يخليك ضامن انك مدي الحياه لن تجرؤ جهه داخل مصر حكوميه او خاصه أنها تقلك انا مش معترفه بالشهادة ديه ومش هارقيك بيها زي ما بيحصل في الماستر دلوقتي... يعني تاخدها وتقدم بيها في اي مكان واي وقت وانت مطمن
كده انا خلصت... يارب أكون جاوبت علي الاسئله المتداوله... ولو فيه جديد ها كتبه علي طول أن شاء الله... بالتوفيق للجميع
الكاتب :: Ahmad Hassan