.. جايلي عرض عمل في دوله كذا .. اروح ولا مروحش ؟

السؤال الذي حير الملايين .. جايلي عرض عمل في دوله كذا .. اروح ولا مروحش ؟
لما حد يجيله عقد عمل او عرض عمل ومحتار يقبل ولا لأ

لازم يفكر في 3 حاجات :
1- وضعك في مصر
2- متوسط تكاليف المعيشه في اليلد اللي هتروحها
3- هدفك او طموحك من السفر
.
رقم 1 : وضعك في مصر
لو انت بتاخد 3000 او 4000 جنيه واعزب
او بتاخد 5000 او 6000 جنيه ومتزوج
ساعتها حياتك في مصر شبه مستقره .. ساعتها لما تحب تطلع برا يبقي تطلع علي حاجه مضمونه وافضل وظيفيا واجتماعيا من وضعك بتاع مصر
.
لكن اسف لو انت بتشحت في مصر او بتاخد يادوب 500 جنيه في الشهر وقتها اي مرتب بأي وضع برا مصر هيكون احسن من وضعك اللي في مصر وتقبل بأي عرض يجيلك فورا
.
رقم 2 : متوسط تكاليف المعيشه في البلد اللي هتروحها
لازم مرتبك اللي هتاخدة في الدوله اللي رايحها يكون علي الاقل مغطي الحد الادني لمتوسط تكاليف المعيشه
.
يعني مثلا مينفعش تقول عايز اعيش في المركز المالي او دبي مارينا او البارشا في دبي ومرتبك 500 درهم بس .. معلش يعني اديني عقلك وامشي انت حافي
هتعيش ازاي بالراتب دة ومتوسط تكاليف المعيشه في دبي عالي جدا جدا جدا مهو اكيد مش هيكفوك مهما عملت
.
لازم تعرف الحد الادني من متوسط تكاليف المعيشه هناك ودة بتعرفه من موقع https://www.numbeo.com/cost-of-living/ وعلي اساس الحد الادني دة هتعرف تعمل تقييم للراتب المعروض عليك وهل هيكفيك ولا لأ
.
رقم 3 : طموحك وهدفك من السفر
لو طموحك هو التحويش وانك تحط القرش علي القرش عشان تهاجر بلد افضل بعد كام سنه وقتها لازم تروح علي مرتب تعرف تحوش منه .. يعني بالبلدي لازم يدفعوا ليك ثمن غربتك اللي هتتغربها
.
لكن لو طموحك هو انك واخد السفر دة مرحله مبدئيه بس عشان تخرج من مصر وبعد كدة ربنا يفتحها عليك وتترقي يبقي ساعتها هتقدم تنازلات عادي ومش شرط تاخد بدل سكن وبدل مواصلات واوفر تايم وبتاع .. هتقدم تنازلات عشان تعرف تسافر وتاخد خطوة مبدئيه
.
اما بقي لو طموحك الهروب من مصر وخلاص يبقي ساعتها اقبل بأي حاجه حتي لو عرضوا عليك انك تشتغل بدون مقابل .. ما انت عايز تهرب وخلاص بقي
.
دة الملخص باختصار .. احسب حسبتك بناءا علي ال 3 عوامل دول وحدد قرارك بنفسك بدون الاستعانه بأي حد وطبعا استخير في الاول والاخر
بالتوفيق واقعدوا بالعافيه 
‎Ahmed Mohamed