ايه طريقة الإهتمام اللي انت محتاجها و تحسسك انك مبسوط و لاقي نفسك في العلاقة دي

السلام عليكم .. أولا قبل مابدأ سؤالي أرجو من الله انه يتقبل جميع دعواتكم و يحل مشاكلكم و يسعد قلوبكم و يصلح ما بين قلوبكم و أرواحكمو يهدي سر الجميع يا رب ان شاء الله بإختصار جدا.. انا 26 سنة الحمد متعلمة تعليم عالي و بدرس و بشتغل ابحاث و حاجات جميلة كدا و حياتي العلمية تلاقوني ذكية اوي و زي الفل

.. انا طفشت عرسان اد كدا و عمري مارتحت لحد.. أجي بقى اول مرة انا اعجب بحد و هوا معجب بيا و عايز يرتبط بيا أقلب بطيخة و غباوة الدنيا كلها تحل عليا من حيث لا ادري!! أنا اجتماعية اوي طول ما الموضوع مادخلش في ارتباط.. مشكلتي اني معنديش خبرة اطلاقا في العلاقات و الارتباط و ماليش ابدا في الصحوبية و علاقاتي بزمايلي الولاد محدودة جدا.. دلوقتي في حد زميلي في الجامعة.. اكبر مني ب 3 سنين.. هوا حد محترم جدااااا و من عيلة محافظة و صاحب دين و خلق.. المشكلة ان هوا ارتبط 3 مرات في حياته (مش دي المشكلة) الفكرة انه كمان سافر و درس برا و هوا قارئ و مثقف جداا و بيقرا دايما في الفلسفة و انسان ذكي و عميق اوي و منطقي و يفكر و يحلل و امين جدا في كلامه و تصرفاته و مشاعره.. انا كدا جدا في دراستي و شغلي.. اجي بقى عليه ابقى عاطفية جدا و لا منطقيه و مندفعة و بتصرف زي الأطفال مش تصرفات ناس ناضجة كدا.. هوا شاريني و متمسك بيا عشان اول مرة اتكلمنا مع بعض قعدنا بتاع 3 ساعات بنتناقش بعمق اوي في مواضيع كتير و نختلف و ابرز رأيي و واثقة في نفسي اوي.. فالراجل انبهر الصراحة.. بعدها بكام مرة لما ابتديت اتحرك مشاعريا من ناحيته تصرفاتي اتغيرت و سيبت النشاطات و التمرن بتاعي و بقيت كيوت اوي و كل حاجة حاضر و اللي تشوفه و هوا بيكره الخضوع دا و المصيبة اني مش كدا ابداااا ولا عمري هاكون كدا.. احنا داخين على 3 شهور و هوا يا اما قعد معايا يشرحلي و يفهمني ازاي اتعامل معاه و ازاي افهمه و ازاي ان طريقة الاهتمام اللي انا شايفاها صح من وجهة نظري مش شرط تكون هيا دي اللي هوا محتاجها.. و انا مافييييش .. الفكرة اني فعلا ابتديت احبه و هوا بيراعيني و بيحافظ على مشاعري اووي و بيحترم حدودي جدا اللي ناس كتير بتشوفها تزمت.. زي مابخرجش و مابسلمش بإيدي و كدا يعني.. السؤال دلوقتي هوا قالي تحديدا انه شخص tough يعني مش بتاع يوجوتي و يا نونة و اأكله و الدلع دا .. هوا عايز حد يعامله بنضج خصوصا انه شغله من الحاجات القضائية و كدا فهوا يا اما شاف و محتاج حد ناشف كدا يسنده و يقف جمبه (زيي كدا في الشغل و الدراسة) و يفهمو بعض و يتبسطو في حياتهم هوا قالي انا مش مبسوط.. نفسي تهتمي بيا بالشكل اللي انا محتاجه (و من فترة كدا قالي انا محتاج بريك و فعلا خد جمب يةمين كدا و رجع عالطول عادي و بيديني بدل الفرصة الف) و انا عايزة احافظ عليه جدا هوا قالي: نا محتاج تلاقي فكري و عاطفي و اننا يبقى كلامنا و نقاشتنا عميقة و نفكر و نتعلم سوا و كدا (مش طول الوقت طبعا بس مايبقاش كله بلا هدف) he needs deep conversations فالسؤال موجه للولاد الأول انت لو حد ناشف و مسؤول و عميق كدا.. ايه طريقة الإهتمام اللي انت محتاجها و تحسسك انك مبسوط و لاقي نفسك في العلاقة دي و ايه الحاجات اللي تخليك تنفر و ازاي البنت تهتم بيك انا كل شوية اأكله و اجيبله اكل و اهتم بيه اكنه عنده 5 سنين و هوا ياعيني و الله تعب .. نفسي اوووي بجد اعرف اسعده و اخليه مبسوط... ممكن تدعولي ربنا يجمعنا على خير ان شاء الله و تساعدوني

وفقا للمصدر 
خطيبك ده إنسان عملي وانتي كمان محتاجه بس تحسسية بالاتي ١- كلامك معاه يكون عميق طول ما الموضوع عميق. يعني متقلقيش وتقلبي الكلام بهزار ٢-أوقات كتيره هيعوز منك تكوني بنوته جميله بتهتم بيه بس حاولي متكونيش اوفر اوييي بحرص ٣-الراجل اللي زي ده مش هيجي بالأكل والشرب هيجي بالعقل ٤-حاولي تشاركيه في شغله ومشاكله علشان يحس انك سند ليه وهيستفاد منك في الجواز مش متجوز صنم اكل ونوم وخلاص اخيراً انتي حد كويس لأنك محترمه وبتدوري علي اللي يريح جوزك مستقبلا