نصب البنات الي بتلف على العماير والبيوت في مصر وتقول انك كسبت مبروك ..!!

صباح الخير .. كنت عايزة أحكي موقف حصل معايا أنا وماما امبارح علشان الناس تخلي بالها.
امبارح الصبح ، في بنتين في أواخر العشرينات خبطوا علي الباب ، وماما فتحت لهم .. قالولها "احنا جايين لحضرتك علشان افتتاح سوبر ماركت جديد في السبعة

عمارات ، وجايين ندِّي لحضرتك عبوتين شامبو بانتين هدية" (والعبوتين دول كانوا ملفوفين في كيس بلاستك ومعاهم ظرف صغير) ولما شافتني طالعة بشوف مين دول اديتني عبوتين شامبو تانيين ملفوفين برضه في كيس بلاستك ومعاهم ظرف .. ف المهم ، ماما بتقولها "ده ايه دول ؟"
الست دي قالتلها "الظرف ده ممكن يكون مكتوب في هدية تانية ، هيبقي حظك زي العسل لو طلع إنك فعلاً كسبتي معانا"
والست مدتلناش فرصة وراحت هي فاتحة الكيسين وفتحت الظرفين وكان مكتوب عليهم "مبروك ، كسبت عبوتين شامبو تانيين "
ف قالت لنا "والله حظكم حلو ، بس شرط علشان تاخدوا الهدية انكم تدفعوا ١٨٠ جنيه"
والجدير بالذكر إن الموقف ده حصل مع جدتي من شهرين بس في أكياس اريال ولما فتحت الأكياس كلها ، لقت متعبي فيها "دقيق" !!!
ف ماما قالت لها "لا شكراً ، مش عايزة حاجة !"
الست قالت لها "مينفعش أنا كدة هيتخصموا مني !! علشان فتحتي الظرفين"
ماما قالت لها "أنا مفتحتش حاجة ، انتي اللي فتحتيهم ، ومش هيتخصموا منك احنا مفتحناش العبوات أصلاً"
وراحوا البنتين دول خدوا بعضهم ومشيوا وهما بيبرطموا.
وبعدها بشوية نزلنا ، لقينا جارتنا اللي تحتنا بتقولنا إن قالولها نفس الكلام ، وقالولها ان احنا اشترينا منهم علشان يقنعوها !!!
وهما عمالين يلفوا علي العمارات اللي جنبنا..

فالبوست ده تحذير للناس علشان دي طريقة نصب جديدة ، وممكن جداً كان اللي في عبوات الشامبو دي حاجة من اللي بتتصنع تحت السلم ومش مشكلة الناس تتأذي بس ياخدوا هما الـ١٨٠ جنيه.
فمتفتحوش لأي حد الباب.. وربنا يستر علينا في الزمن ده.
-البوست ده لا يمت بأي صلة لبانتين أو اريال .. عادي ممكن يكونوا واخدين عبوات مستعملة أو أكياس مستعملة وينظفوها ويعبوا فيها ويقفلوها كإنها جديدة-
من نهال الجهوري