كانت صبية بقلب أخضر
زهرة في وسط الشوك بتكبر
شايفة الحياة صافية وبريئة
وما تعرفشي ايه المقدّر
من صغرها كانت بتحلم
زي كل البنات بترسم
عروسة لابسة فستان وطرحة
بس اللي حلم غير اللي فسّر
قابلت ولد حبت كلامه
شدها أوي باهتمامه
صدقت ما كانتش عارفه مخبي ايه
فيه ناس كتير الشر فيها
والمظاهر بتداريها
وزهرة مش شايفة الوش الحقيقي ليه
الطيبة دي ما تغرّكيش
مهما يقول ما تصدّقيش
ده مافيش أسهل من الكلام
إنتي أصلاً مش فارقة عنده
أناني وبيفكر في نفسه
يومين وهيقول لك سلام
وف يوم ولا كان يخطر في بالها
قال لها كلام وجعها
وببساطة الندل باعها
سابها غرقانة ف دموعها
لما من غير ذنب سابها
ابتدا يزيد اكتئابها
حسّت إنه خلاص ما فيش خير في البشر
صدمة صعبة جت في ثانية
حوّلتها لواحدة تانية
أصل أول جرح سهل يسيب أثر
إوعي تبكي مهما شوفتي
في الحياة مكتوب يا بنتي
ننجرح علشان نشوف
عيشي أحلامك زي مانتي
قومي تاني لو وقعتي
مهما كانت الظروف
0 تعليقات
أهلا وسهلا ومرحبا بك في موقع تغطية مباشر : ضع ردا يعبر عن اناقة أخلاقك ، سنرد على اي استفسار نراه يحتاج الى اجابة ، ادعمنا برأيك وضع تعليقا للتشجيع ..