#جديد 2019 طريقة ::: اكله كباب حلوه مشويه عالفحم

كباب ❤

ومن احدى اسباب السعاده اكله كباب حلوه مشويه عالفحم
وكباب يعني عيش وسلطه خضرا وسلطه طحينه وصحبه حلوه وقاعده جميله.
ولان مش كل يوم هناكل كباب
يبقي لما نعمله عاوزين نعمله صح

اهم حاجه في اللحمه المشويه (الكباب)اولا نوع اللحمه المستخدمه
من الذ واشهر انواع اللحمه في الكباب هوه طبعا اللحمه الضاني
وده بسبب ان احتوائه على الكتير من الدهون بيدي للحمه طعم جميل اولا وريحه مميزه ولحمها مش بيشد بعد الشوي.
(اللحمه الكندوز) مش مناسبه ابدا ولا تنفع في الشوي خالص.
(اللحمه البتلو) تنفع في الشوي وصحيه عشان مفيهاش دهون ولكن طعمها بيكون اقل كفاءه عن الضاني.
(قطعه اللحمه البقري الفيليه)هي اسمها كده على فكره بالعربي والانجليزي والالماني الي هي (عرق الفلتو)
هي قطعه لذيذه جدا للي مش بيحبوا الضاني وبتنفع جدا في الشوي لان لحمها طري جدا وبتستوي بسرعه.
نيجي بقي للتتبيله:
اول واهم خطوه في التتبيله هوه طول مده التتبيل،بتفرق جدا جدا في الطعم وفي سرعه سوا اللحمه وكمان طراوتها
وافضل شيء ان اللحمه تبات في التتبيله ليله كامله.
عشان اللحمه تطلع طريه كمان وتستوي حلو
اوعي تحطيها عالشوايه سواء جريل او طاسه او فحم وهي بارده او مش سخنه كويس(يعني الشوايه لازم تكون سخنه)
والا اللحمه هتفقد السوائل الي جواها وتنزل ميتها وتتحول من مشويه الي كانها لحمه مسلوقه.
واللحمه متفضلش على النار كتير اول ماتستوي تتشال وتتغطي لحد ما تخلصي الكميه الي بتشويها❤
نيجي بقي اخيرا للتتبيله:
التتبيله بحر واسع واذواق وتجارب طبعا
بس دي تتبيله الحاتي بالظبط❤️:
دايما يفضل البصل والطماطم يكونوا نصف وزن اللحمه
يعني لو بتبلي كيلو لحمه يبقي
نصف كيلو بصل مقطع
نصف كيلو طماطم معصوره في الخلاط
بتضربي الطماطم ومعاها البصل في الخلاط كويس جدا ومعاهم نص معلقه خل
وتلات معالق زيت زيتون ولو مفيش يبقي زيت ذره او عباد شمس
والبهارات الاتيه:
اعمليهم في برطمان بنسب متساويه وخدي منهم معلقه كبيره للكيلو الواحد
كزبره مطحونه
زنجبيل مطحون
حبهان مطحون
قرفه
كبيبه صيني
زعتر
بابريكا
وطبعا ملح وفلفل اسود
وتترك في التتبيله مش اقل من ١٢ ساعه

انجي محمد