تحضير : الدجاج المقلي المقرمش - كنتاكي وكوكي والبيك

الدجاج المقلي المقرمش❤

طبق رائع على مائده رمضان وبيحبه الكبار قبل الصغيرين.

حد معانا عاوز يعرف ازاي يعمل احلى فراخ مقرمشه بلونها الدهبي الي يجنن والقرمشه مع كل قطمه❤
مش شاربه زيت خالص
والاهم من كده مستويه من جوه جدا
المقادير:
انا استخدمت فرختين وزنهم كانو ١٨٠٠ جم
كوب ونص دقيق
كوب ونص لبن رايب
بيضتين
معلقتين كبار خل
ملح تقريبا ملعقتين كبار
فلفل اسود
(معلقه كبيره ونص بصل بورد
معلقه كبيره ونص بابريكا
معلقه كبيره ونص زنجبيل
معلقه كبيره بصل بودر
نص معلقه كبيره كمون
نص معلقه كبيره كزبره مطحونه
نص معلقه كبيره بهارات دجاج
ربع معلقه كبيره قرفه وحبهان مطحون معا.
لو عوزاها حاميه حطي شطه فالتتبيله وفي. دقيق. التحمير.

الطريقه:
اول خطوه قطع الدجاجه الي ٨ اجزاء او اكتر ويفضل اختيار دجاج حجمه صغير.
اعملي بالسكينه شقوق كتير في الفراخ.
اخلطي الدقيق مع جميع البهارات ثم اضيفي الخل والبيض واللبن الرايب وقلبي الخليط كويس جدا
وحطي فيه الفراخ قطعه قطعه وخلي التتبيله توصلها من جميع الجهات.
غطها ودخليها التلاجه تبات لحد بكره👍🏻
نيجي بقي لوقت التحمير:
نطلع الفراخ من التلاجه
نحضر وعاء عميق نحط فيه كوبايه ونص دقيق ابيض
ونص كوبايه دقيق ذره اصفر
ونحط عليهم كللل البهارات الي حطيناها على الفراخ بس قللي نسبه الملح عشان متبقاش حادقه هتشمي ريحه الدقيق زي الفيجتار.
ولعي على الزيت وخليه يسخن وبعد كده نزلي حرارته لمتوسطه يعنب انا عندي البوتجاز لحد رقم تسعه سويت الفراخ على ٤
الزيت عندك سخن بس التسويه هتكون على متوسطه.
اهم حاجه يكون الزيت غزير ويكون مغطي قطع الدجاج.
هتمسكي قطعه الدجاج من الخلطه زي ما هي وتحطيها فالدقيق يغطيها من كل الحهات. كويس جدا وحطيها فالزيت.
بعد ما تحطيهم فالزيت غطي الحله او الطاسه
وبعد عشر دقايق قلبي قطع الدجاج على الجهه التانيه.
وبعد عشر دقايق كمان قلبيها لمده دقيقه وبعد كده طلعيها.
الفراخ بتقعد على النار مده تلت ساعه وتكون استوت وزي الفل من جوه ودهبيه من بره بس المهم متعليش النار عن المتوسط.