المحشي المصري تكات وحركات طريقة مميزة بتجنن

كمان المحشي له تكات
اول حاجه هقولكم خلطه المحشي
طبعا الكميات نسبه وتناسب على حسب المحشي الي هتعمليه سواء فلفل او كوسا ورق عنب او كرنب وفي ناس بتحشي طماطم

المهم يا جميلات
في طريقتين للخلطه اما انك تعمليها ني في ني يعني بعيد تماما عن النار وكله عالبارد ودي طريقه صحيه اكتر
اما الطريقه التانيه انا بعتبرها الذ طعما وهي عالنار
وانا بحب اخلط بين الطريقتين ندخل فالمهم باه
تحطي زيت فالحله تخطي عليه بصل مفروم تشوحيه وبعد كده تنزلي عليه بالخضره المفرومه الي هي شبت وبقدونس وكزبره والمحشي بيحب الخضره ونقلب تقلبتين
بعد كده ننزل بالطماطم المضروبه فالخلاط وعليها معلقتين صلصه فاللحظه دي بحب اشيل الخلطه باه من عالنار واحط توابلي الي هي ملح وفلفل اسود شويه شطه لو بتحبيه حامي ماجي ونعناع وشويه كمون وحبه بهارات بتفضلي طعمها انا بحب بهارات السبع بهارات قلبي كله وبعد كده حطي الارز المغسول والمتصفي جيدا وقلبيه معاهم(شامين الريحه)😀😀
طبعا ماورين باه الكوسا مثلا او محضرين اي نوع محشي هنحشيه
بنرص الكوسا فالحله لما بنحشيها مبنكبسش الارز جواها ومش بنملاها للاخر عشان الارز لما بيستوي بيزيد
اما نيجي نحط الشوربه الي بنسقي بيها المحشي عشان يستوي وممكن يكون ميه وماجي مذاب فيها مع ملعقه صلصه ده مهم جدا كميه السائل لنجاح المحشي
زي ما في الصوره موجود انا بحط السائل في واحده واحده والباقي بحطه فالحله الميه هنقول تقريبا تكون واصله لتلت الكوسا او الفلفل من تحت
نحط في قاع الحله دايما شرائح بصل وبصل وطماطم وبعد كده نرص عليهم المحشي مهما كان نوعه
ممكن بطاطس وبصل بس وفالكرنب بنحط عروق الكرب
نحط طبق على وش المحشي ده
بيساعد عالتسويه
وطلعا قبل ما نحط المحشي فالحله لازم نحطله قاعده بتكون عباره عن طماطم وبصل وبطاطس متقطع شرايح او الي موجود فيهم عندك يعني ممكن بصل وبطاطس بس مثلا بيدي اولا طعم وثانيا بيحمي المحشي او كانت النار عاليه ولا حاجه انه ميتحرقش
نحطه على حراره عاليه جدا لمده عشر دقايق يغلي غلوتين وبعد كده نوطي عليه يعني مثلا لو البوتجاز اعلى حاجه فيه ٩ نسويه على ٤ او ٥ على حسب بوتجازك

وبياخد تقريبا ساعه وعشر دقايق