تالتة إعدادي دي من أسهل السنين الدراسية الي عدت عليا

تالتة إعدادي سنة صعبة , كيفية حفظ الدراسات بدون روت , لازم تذاكر 28 ساعة عشان تعرف تعدي 

كل دي جمل أكيد سمعتها و جابتلك إحباط من أول السنة
بس الي أنا عايز أقولهولك إن تالتة إعدادي دي من أسهل ا
لسنين الدراسية الي عدت عليا و جبت فالترم الأول 139.5 و الترم التاني 139.5 يعني 279 من 280 و دخلت مدرسة المتفوقين بالعلوم و التكنولوجيا بالدقهلية و بالنسبالي برضه كانت من أحسن السنين إجتماعيًا
و دي شوية نصايح لو مشيت عليها هتجيب 280 إن شاء الله " و لو حسيت إن البوست طويل اقرأ عناوين الفقرات بس , بس بنصحك تقرأه كله مش هياخد منك 5 دقايق و متعملش Save Post "
1 : متروحش المدرسة
- لو أنت بتاخد دروس أو بتعرف تذاكر و تفهم لوحدك اوعي تروح المدرسة
انت كده بتضيع وقت أنت أولي بيه
بتصحي الساعة 6 تروح المدرسة ترجع الساعة 3 تعبان و محتاج تستريح و لو هتروح دروس أو وراك تمرين مثلا و مش هتلحق تخلص أي حاجة و هيبقي اليوم بالنسبالك 3 ساعات أو ساعتين بس و ممكن تضطر تسهر و مش هتبقي مركز و فكك من أي حد بيقولك الغياب هتتفصل بسببه أو هيحصلك أي حاجة
2 : اصحي بدري
نام بدري و اصحي بدري صلي الفجر و اقرأ الأذكار و ابدأ يومك
الوقت هيكون فيه بركه رهيبة و هتخلص الي عليك بشكل أسرع و هتكون نفسيتك مرتاحة و انت بتذاكر
3 : قسم وقتك
أوعي أبدا تسيب الواجبات و الدروس تتراكم عليك ده هيعمل عليك ضغط رهيب جدا و أنت هتكون تايه و مش عارف تبدأ تخلص إيه
قسم وقتك و شوف هتخلص إيه النهاردة و قسمهم Tasks و حدد لكل تاسك مدة معينة يخلص فيها و متكونش كبيرة يعني لو هتذاكر الدرس الأول تاريخ قسمه علي أتنين و حدد لكل واحد وقت و لما تخلصه دلع نفسك 10 دقيقة " متقعدش علي الموبايل ولا اللابتوب ولا تتفرج علي التليفزيون "
لو صحيت بدري زي ما قلتلك فرقم 2 و قسمت وقتك هتلاقيك خلصت حاجات كتير جدا علي الساعة 12 الضهر هيبقي معاكي باقي اليوم تعمل فيه كل الي أنت عايزه تروح تلعب كورة أو تقعد علي الموبايل بس ياريت مش كتير يعني لو هتقعد علي الموبايل أو اللابتوب أو التليفزيون أقصي حاجة 3 ساعات و خلي في فاصل فالنص
4 : التكرار بيعلم الشطار
لو ذاكرت نص درس دراسات و جيت تكمل الباقي فاقرأ الي ذاكرته أكنك بتذاكره من أول و جديد
و أعرف دايما إن أي حاجة مش بتراجع عليها هتنساها فأنت مثلا طول اليوم بتذاكر مادة فأخر اليوم اعمل مراجعة سريعة علي مادة تانية بحيث متنسهاش و تفضل حاضرة فدماغك دايما
5 : حل كل التدريبات
فكل المواد التدريبات أنت تقريبا بتحل السهل الي مش بياخد وقت زي اكتب المصطلح و اختر و اكمل و أي حاجة مفيش فيها كتابة كتير , ده غلط
حل كل التدريبات أو علي الأقل حل بكل الي تقدر عليه مش لازم تخلصهم كلهم أوي بس فعلا طلع كل جواك و لما تحس إنك خلاص مش قادر تكمل مش مشكلة و ابقي اقرأهم او حلهم بعدين
6 : الموبايل و الفيس مش حرام
حاجة منتشرة عند أغلب الناس و هي إنك عشان تجيب درجة عالية إنك مينفعش تلمس الموبايل أو اللابتوب بس ده غلط
لو مخلص كل الي وراك اقعد براحتك جدا
فالترم الأول و في شهر 1 يعني قبل الإمتحان بكام يوم كنت بحمل League of legends و بلعبها و عادي جدا بس كنت بخلص الي ورايا الأول
فالترم التاني و في ليلة إمتحان العربي كنت قاعد بصلح سوفت وير موبايلي و بلعب و قاعد علي الواتس برغي مع صحابي
فالخلاصة إن مفيش مانع تدلع نفسك بإنك تستخدم السوشيال ميديا أو الموبايل و اللابتوب عموما ما دام مخلص كل الي وراك
7 : علاقتك بربنا
أهم حاجة هي علاقتك بربنا
حافظ علي صلاتك و لما تصحي بدري زي ما قلتلك في رقم 2 اقرأ الأذكار بتخلي اليوم فيه بركه و أنت دايما بتسجد ادعي الي نفسك فيه , ادعي تطلع الأول , ادعي تجيب الدرجة الي أنت عايزها و متزهقش و صدقني الدعاء بيغير القدر
8 : حدد هدفك
اعرف أنت بتذاكر ليه و لمين و لو أنت مش هامك الترتيب علي الدفعة أو تدخل مدرسة ثانوية بتشترط نسبة معينة من الدرجات متسحلش نفسك فالمذاكرة و فنفس الوقت متهملهاش و هات درجة كويسة تفرح بيها أهلك
و لو أنت عندك هدف معين مترتب علي نتيجتك في تالتة إعدادي هات Sticky note و الزقها فمكان تكون دايما قدامك فيه و أنت بتذاكر عشان كل ما تزهق و تتعب تفتكر إن إن شاء الله تعبك مش هيروح
9 : المكان الي بتذاكر فيه
أهم حاجة هي المكان الي بتذاكر فيه
ذاكر علي مكتبك و يكون دايما نضيف و مترتب و دايما ذاكر عليه
لو معندكش مكتب هات ترابيزة قصيرة و حطها علي السرير و ذاكر عليها " لما ضهري كان بيتعب من مذاكرة المكتب كنت بعمل كده و كنوع من التجديد "
و خلي دايما الأوضة الي بتذاكر فيها نضيفة فأول ما تصحي من النوم رتبها و ابدأ ذاكر
---------------------------------------
و في النهاية متخليش حد يحبطك أو يوقفك و محدش هيستفيد من مذاكرتك غيرك أنت
و لو أي حد عنده سؤال فأي مادة يبعتهولي و لو عارفه مش هبخل عليك و لو عندك أي سؤال أنا تحت أمرك فأي وقت