تجربتي في استخراج #تصريح العمل و #تصريح السفر بمصر عن طريق النت الكترونياً

الموضوع ده ممكن كتير يكونوا عارفينه وجربوه لما نزلوا اجازه بس انا عن نفسي أول مره أعرفه واطبقه بنفسي وعجبني فعلا سهولة وسرعة استخراج التصريحين فقولت أكتب تجربتي بالتفصيل يمكن حد يستفيد منها فعلا زي مانا استفدت.

مبدأياً تجربتي كانت بتاريخ ٦ / ٢٠١٩ علشان لو حصل اي تغييرات بعد كدا

🔴#ملحوظه (الموقع يعمل داخل مصر فقط)

أولا #تصريح العمل :

١/ بتدخل علي موقع وزارة الداخلية المصرية وبتعمل إنشاء حساب جديد وتسجل فالموقع من هنا
https://moi.gov.eg/

٢/ بعد مابتعمل الحساب بتدخل علي تصاريح العمل بعدين تجديد تصريح العمل وبتملي البيانات المطلوبه منك وحاول تكتبها زي الموجوده فجواز السفر والبطاقه الشخصيه وتمشي مع الخطوات سهله بس لازم تكون مجهز معاك صورة البطاقة الشخصيه وصورة جواز السفر وصورة التصريح القديم وصورة الاقامة او تأشيرة الخروج والعوده او تأشيرة العمل اللي فالجواز علشان هيطلبهم منك ف آخر خطوه وبعد كدا بتأكد الطلب وبيطلعلك رقم لطلبك بتاخده سكرين شوت وتحفظه عندك علشان هتشيك بيه علي الطلب بتاعك.
بعد كدا في نفس اليوم او تاني يوم الصبح ممكن حد يكلمك من مكتب تصاريح العمل يسألك عن تاريخ نهاية التصريح زي ماحصل معايا وبيقولك في خلال ٣ ساعات تدخل تشيك علي الطلب علشان تسدد المبلغ المطلوب وبالفعل بعد كام ساعه كدا بيظهرلك رقم فاتوره للطلب بتاخده وتروح اي مكان فيه ماكينة فوري بيدفعلك المبلغ المطلوب وبعد كدا بيجيلك رساله ان تم قبول طلبك وفي خلال ٣ أيام بيجيلك التصريح لحد البيت من البريد المصري علي عنوانك اللي هتسجله وانت بتملي البيانات بس بيكون عامل زي الكرنيه كدا وكمبيوتر كله مش التصريح الورقي القديم.

ثانيا #تصريح السفر :

١/ بتدخل علي موقع التجنيد من هنا
https://tagned.mod.gov.eg/18militaryServiceTravelPermissionC.aspx
٢/ تنزل ف اخر الصفحه تختار ف الاخر تسجيل طلب استخراج تصريح باذن السفر.
٣/ تملي البيانات المطلوبه زي الاسم وموقف التجنيد سواء اعفاء أو أدي الخدمه او طالب ولازم تكون معاك الرقم العسكري اللي ف شهادة الجيش علشان هتسجله وبعدين بتسجل عنوانك والرقم القومي والبريد الالكتروني ومهم تتاكد منه كويس لانه بيبعتلك عليه تصريح السفر
٤/ ف الاخر بتختار تسجيل البيانات بعدين بتظهرلك صفحه بيقولك تم تسجيل طلبك بنجاح وبيطلعلك رقم للطلب وبيقولك يمكنك الاستعلام عن نتيجة الطلب خلال ٢٤ ساعه بس انا دخلت ف نفس الوقت استعلم ظهرلي لامانع من استخراج تصريح السفر وفي الاخر الرسوم المقرره ٦١.٥٠ ج وكلمة اضغط هنا لتحويلك لشاشة رسوم الخدمه وهنا ف الخطوه دي بيفتحلك شاشه جديده بتختار منها طريقة الدفع اللي هي يا فيزا ياماستر كارد مفيش فوري زي تصريح العمل للاسف فلو معاك اي حاجه من الاتنين هتسدد وفي نفس اليوم هيجيلك رساله ع الايميل بتصريح السفر انما لو مش معاك هتضطر تتابع الخطوه الجايه.
٥/ الخطوه دي للي مش معاه فيزا او ماستر كارد :
في خدمة في فودافون كاش اسمها الفيزا الافتراضيه دي لو انت مش مشترك في فودافون كاش بتروح لاي فرع فودافون وتقوله عاوز فيزا افتراضيه بالمبلغ المطلوب وطبعا هي بتزيد عليها رسوم الخدمه من فودافون وبمجرد مابتدفعله بيبعتلك علي رقمك رساله فيها ارقام فيزا بتقدر تستخدمها في الدفع علي اي مواقع شراء اونلاين زيها زي اي فيزا فبالتالي بتدخل ع موقع التجنيد وتفتح طلبك وتسدد وتدخل بيانات الفيزا الافتراضيه اللي جتلك وبتسدد عادي بس خلي بالك علشان الفيزا الافتراضيه دي صالحه لمدة ٢٤ ساعه فقط ونفس النظام بمجرد مابتسدد بيتبعتلك ف نفس اليوم التصريح علي الايميل.
إن أحسنت وأصبت فمن الله وإن أسئت وأخطأت فمن نفسي
أسف علي الاطاله وبالتوفيق للجميع ان شاء الله.

م.ن