تجربة مريرة ومخيفة وتحذير في نفس الوقت من الخطوط التونسية

يوم 6 اغسطس كنت مسافر من القاهرة الى برشلونه مرورا بتونس ، كنت سمعت تحذيرات كتيرة من الخطوط التونسية وان طياراتهم بتتأخر وبيضيعوا الشنط لكن مكنتش متوقع ان الوضع بالشكل ده
مبدأيا طيارة القاهرة تونس اتاخرت حوالي 4 ساعات ،

 المفروض كان الترانزيت حوالي 4 ساعات ونص ولكن مع التأخير وصلت تونس كان باقي حوالي 40 دقيقة على طيارة برشلونه ، على ما نزلنا من الطيارة ووصلت صالة الترانزيت وغيرت البوردنج بواحد جديد لانهم مرضيوش اطلع الطيارة بالبوردنج القديم بتاع مصر ، وصلت للبوابه اتفاجأت انهم خلاص قفلوا والطيارة هتطلع و ومن هنا بدأت قصة معاناه لم اتخيلها ابدا في حياتي .

سالت شرطي في المطار اعمل ايه قال لي ارجع لصالة الترانزيت هما يحلولك المشكلة ، اول ما دخلت صاله الترانزيت وهي غرفة صغيرة فيها اكثر من 100 شخص ، حكيتلهم اللي حصل قالي هات الباسبور والبوردنج ، طيب يا جماعه اعمل ايه دلوقتي يقولي مفيش رحلة غير بعد 28 ساعة !
- 28 ساعه ازاي ده كتير جدا ، طيب يا جماعه ممكن فندق اقعد فيه لحد تاني يوم ؟
- انت مصري لا ملكش فندق
رحت لمدير الترانزيت كلمته بقوله ايه الحل في الوضع اللي انا فيه ده ؟ الاقيه بكل بجاحه يقول لي " خلي السيسي ينفعك" !!!
تعامل عنصري سي جدا 

طبعا الغرفة دي عامله زي السجن والله مش ببالغ فيها اكتر من 100 شخص كلهم نايمين على الكراسي ومفيش مكان اصلا تقعد
طب يا جماعه في اي اكل او مياه ؟
عايز تطلع بره غرفة الترانزيت ادفع للشرطي اللي واقف 15 دولار عشان يطلعك تشتري اكل ( عيني عينك كده )!
كل ما اسال على حاجه الاقيهم يزعقوا ويقولي اقعد حاولت اتصل بالسفارة او اشوف اي حل للاحتجاز ده بس للاسف مفيش نت شغال ولا معايا رصيد اتصل بحد
انا لو وصفت اليوم ده كان عامل ازاي بجد مش ببالغ بس حسيت لاول مره بشعور المسجون في السجن
طبعا اضطريت اني انام على البلاط في الارض والجو بليل كان برد جدا ، لا مياه ولا اكل ولا شرب ، وتعامل سئ جدا من كل موظفين التونسية .
تاني يوم الصبح فوجئت بهم بيقولولي لازم تدفع غرامه عشان تطلع الطيارة ، قلقتلهم ازاي يعني قالولي مفيش غير كده والا هنرحلك مصر ، طلبت منهم ادفع بالفيزا قالولي لازم كاش ، ساعتها فهمت انهم عايزين ياخدوا الفلوس دي لهم وقلتلهم ان مش معايا عير فلوس مصري
بعد محاولات كتيره معاهم وافقوا اني اطلع على الطياره بدون ما ادفع لهم فلوس وقبل ما تطلع بساعه واحدة بس

تفتكروا الحكاية خلصت لحد هنا ؟ لا لسه ليهم تكمله
طبعا الرحلة بتاعت برشلونه اتاخرت وده الطبيعي يعني بتاعهم ، المهم نزلت مطار برشلونه الاقي شنطتي مجتش ! طبعا صدمة كبيرة جدا انا رايح بلد معرفش فيها اي حاجه ومش معايا لبس ولا اي حاجه وكمان الساعه 7 بليل يعني كل المحلات قفلت ( ده النظام في اوروبا ) .عملت محضر في المطار وحتى كتابة التقرير ده ورجوعي لمصر الشنطة مجتش !
بعد يومين سافرت باريس ورحت المكتب بتاعهم في الشانزليزيه حكيتلهم على اللي حصل في المطار وضياع الشنطة واني عايز اعرف حتى هي ضاعت ولا وصلت فين الاقيه بكل برود وتناحه يقولي " اشكون اسويلك "

حرفيا شركة من اولها لاخرها ملهاش كبير ولا انت عارف تتشتكي لمين ولا تعمل ايه ، خربوا عليا الرحلة وكلفوني فلوس كتير جدا اني اشتري حاجات اعرف اكمل بيها السفرية ده غير الاذى النفسي الشديد اللي اتعرضت له
الخلاصة : محدش يسافر مع الخطوط التونسية دي مهما حصل

من محمد السيد  

رد من احد الشباب 

انا بتفق معاك تمام ان الشركة التونسية ومطار قرطاج سيئين للغاية و للاسف الاسؤا انهم عارفين والشعب والحكومة عارفين وفاهمين ولا توجد محاولات للاصلاح الا قليلا ..
على الرغم من سفرى عشرات المرات لتونس الا انى لم اصعد على التونسية الا مرتان وفى الاتنين اتاخرت ..
انا مصور فيديوهات برشا لحالات من التظاهر والاختلافات نتيجة تاخر الطيارة داخل مطار قرطاج ودة للاسف المعتاد ..
وللاسف هناك اجماع فى تونس على رداءة خدمات الشركة التونسية بمطارها وطياراتها و موظفيها وخدمة العفش ..
ومش بس تأخر الطيران لكن اقبح شىء واللى انا اتعرضتله كذا مرة و برشا توانسة كمان هو سرقة الاشياء من الحقائب من عصابات معروفة للسلطات وإن كان فى كلام ان غالبيتهم السلطات هزتهم بس بعد اكثر من ٤ سنوات من الفوضى والسرقة العلنية ..
بالاضافة لسوء اخلاق وقلة ذوق العديد من الموظفين فى المطار سواء كنت اقتصادى او بيزنس ..
الحفيقة مطار قرطاج لا يليق بتونس الجميلة المزيانة و معاملة موظفيها لا تعبر عن طيبة وود شعب تونس المحترم
وانا لا انصح ابدا باستخدام طاىراتها