سؤال المرحلة: عن طريقة الحفاظ على الفلوس من التضخم
ببساطة ان مش هدعي اني عالم اقتصاد وهجيب للناس الزتونة، لان الزتونة ف دول تعجز عن اتيانها اصلا.
لكن انا هتكلم عن فعل شخصي.
عايزين نحافظ ع الفلوس إلي قيمتها بتقل.
العقار:
واحد طبقة وسطي زي اول شئ هيبادر لذهنه العقار، لانه اتربي ان العقار هوه الابن البار.
كلام سليم بس ف عدة نقط مهمه.
هتحط فيه فلوس لكن مش هتعرف تسييلها دلوقتى خالص أو هتسيلها بصعوبة وف الغالب بدون ربح.
رئيس البلد نفسه قال العقار مش هيكون استثمار بعد كده ومع ذلك برضه هيظل وعاء للقيمة بس بالطريقة إلي هقولهاك من وجهة نظري.
تشتري عقار قسط ع مده طويلة بس يكون من شركة موثوق فيها انها هتسلم ف الميعاد بنسب تحميل ووجهات وبناء زي الاتفاق.
تبقي عارف انك مش هتعرف تبيع غير بعد انتهاء مراحل المشروع واقساطه لان الشركة قبل المدة دي هتطرح وحدات ع قسط مدد طويلة والريسيل وقتها هيكون تقيل ف بيعه وبدون اوفر او ب اوفر بسيط.
انا بشوف الايجار فكرة فشله جدا ف السكني لكن لو مجبر تبقي تشتري سكن قريب من جامعات او شركات يمكن تأجيره للطلبة او لموظفين هيكون ايجار اعلي والافضل التجاري طبعا.
التجاري ليه شروط لو داخل مول زي مكان المحل ومساحته ومين الشركة الى هتدير والمول هيستقطب برندات ولا لا وخلافه والافضل تشتري شئ ف الشارع لو انت ف المدن القديمة.
ممكن تشتري ارض تكون ع أطراف المدن القديمة والعمران هيطولها او المدن الجديدة بس ل كلا الحالات هتستني زي ما قولت فوق.
الذهب والدولار:
دي كلها عايزه خبره يعني الدهب ليه طريقة محدده ف شراء السبايك وليه حسابات وعموما سعره بيطلع وبينزل وبيستقر ف برضه عايز مدد طويلة.
والدولار اصلا صعب تدبيره وحتي مع اخبار ارتفاعه وصعوبة تدبيره فهوه ممكن يحافظ ع فلوسك لكن مش هتكسب.
البنك أو البريد:
برضه بيقلل الخسارة بتاعتك شوية لكنه مش بيواجه التضخم لان فايدته اقل.
القسط:
القسط حل محترم جدا جدا لو مش للاستهلاك الفوري.
يعني مينفعش يبقي مرتبك ٣٠٠٠ جنيه وتشتري ايفون ب ٢٥ الف قسط أو تشتري عربيه ملاكي مثلا وتقول دي فرصه دي اقساط بدون فوايد.
انت اصلا مش فوضع يسمح ليك استهلاك الحاجات دي وكده انت بتغرق ف التضخم مش ب تهاجمه.
لكن مثلا يمكن تقسيط اشياء مهمه زي مثلا تجهيز لبنت هتتجوز بالمعقول او تشطيب شقة لعريس أو حتي شراء شقة أو ارض.
حاجة محتاجينها ضروري او قيمتها هتزيد مع الزمن.
التعليم والصحه :
افضل استثمار هوه استثمار ف نفسك او ف ولادك ف التعليم والصحه وده ملوش دعوه بالتضخم لكن مفروض يزيد طول الوقت.
العمل :
زود جهدك ل اقصي حد وحاول تشتغل مع جهات عملتها مختلفة لو تقدر زي دول الخليج او اوروبا لو انت شغال فريلانسر أو حتي لو قدامك فرص سفر مناسبة بعملة اقوي ممكن تعمل ده.
البيزنيس :
وده خياري الشخصي فلوسك تبقي شغالة ف السوق بتشتري بسعر شراء اليوم وتبيع بسعر بيع اليوم وفلوسك تكون ف بضاعه عارف انها مستقرة او بتزيد.
من الاخر تكون ع وش السوق وسايب نفسك للميه ترفعك ومعندكش اواجل كتير الا لو مضمون تحصيلها 100٪ وكمان سعرها اعلي من الكاش ومع الاضطرار يعني لو عندك ركود.
وف نفس الوقت متتعاقدش ع توريد منتجات او مصنعات لمدد كبيرة الا لما يكون عندك خاماتك الى تكفي الاتفاقات دي وديما اتفاقك يكون محدود المدة.
ف الاخير الصدقة تطيل العمر وتطفئ غضب الرب وإلي بيتقي الله بيجعل له مخرجا.
وتقليل الاستهلاك والمصاريف إلي مش لصيقة بالانتاج (بكل انواعه) ده واجب ف كل الاحوال لازم تبقي كوست كيلر، اقتل التكلفة الغير مفيدة.
ده رؤيتي ممكن تكون غلط والإنسان اعلم بشأن نفسه.
0 تعليقات
أهلا وسهلا ومرحبا بك في موقع تغطية مباشر : ضع ردا يعبر عن اناقة أخلاقك ، سنرد على اي استفسار نراه يحتاج الى اجابة ، ادعمنا برأيك وضع تعليقا للتشجيع ..