خلاصة القول في زياره السعودية سياحه ..

اولا قبل ما اسافر سالت بعض الاسأله هنا علي الجروب وللاسف لما سافرت لقيتها كلها غلط فشكرا للي حاول يساعد بس يا ريت نقول معلومات احنا واثقين منها .. فانا حجاوبكم علي الاسئله اللي معظم الناس بتسالها ..

١- انا معايا شنجن او تأشيره امريكا او انجلترا ساريه اقدر اطلع فيزا ؟

طبعا وبمنتهي السهوله الموضوع بياخد ٥ دقايق بالظبط بتدفع ٤٨٠ ريال تتدفع بالفيزا ،وبيختملك دخول وبيكتب بخط اليد رقم التاشيره وبتبقي صالحه لعام هجري كامل .

 

 

٢- هل لازم اكون استخدمت التاشيره قبل كده ومن بلد صدورها ؟

لو سالت اي حد حيقولك اه طبعا ولازم ، بس انا بقولك اه لازم تكون التاشيره استخدمت بس محدش بيبص في الشنجن اتختمت فين ولا طالعه منين ، اهم حاجه انها موجوده ومستخدمه .

٣- لازم استخدام الطيران السعودي ؟

الارشادات بتقول طبعا ولازم ، بس انا وكل اللي معايا محدش اتسال انت جاي علي طيران ايه ولا شافوا اي تذكره .

 

٤- لازم ننزل برنامج اعتمرنا وتوكلنا لحجز العمره ودخول الروضه ؟

اه لازم تنزل اعتمرنا علشان تحجز العمره وهو تطبيق سهل جدا ولكن مع الزحام محدش بيبص فيه ونادرا ما حد حيسالك عنه، وبتدخل مادمت لابس لبس الاحرام. اما توكلنا فهو برنامج دايما مهنج ولا يعمل وملهوش لازمه غير في محطة القطارات ولو وريته ورقك سليمك حيعديك حتي لو البرنامج مش شغال .

٥- بيسالوني حتعمل ايه في السعوديه او انت جاي عمره ولا لا ؟؟

مش حنضحك علي بعض كل اللي رايحين رايحين يعتمروا وهم عارفين ده ، ولو حتي رايح بلبس الاحرام محدش بيكلمك .مادام ورقك سليم .

٦- يعني احجز واروح علي ضمانتك ؟؟

ادام ورقك سليم ونيتك سليمه لزياره اقدس مكان في الارض فروح وعلي ضمانتي ومتنسنيش من الدعاء .

وعمره مقبوله مقدما

تعديل ١ : اولا احنا جروب ١٠ افراد وكل ما حدث حدث معنا جميعا ده غير من قابلنا في خلال السفر وده ميخلهوش تجربه شخصيه .

ثانيا : مش معني اني بقول ان محدش بص في تصاريح يبقي ده معناه ان حضرتك تفهم اني بقولك متنزلش اعتمرنا او متاخدش تصاريح والدليل اني حاطط صوره للتصاريح ، ولو انت فهمت ده فدي مشكله حضرتك

انا بحاول افهم الناس ان لو ورقك سليم سافر وبسرعه لانها فرصه الله واعلم حتتكرر تاني ولا لا ، وعلشان في كتير من اصحاب الشركات المتضرره بيحاولوا يصعبوها علي الناس فحبيت اعرفكم هي اد ايه سهله وميسره باذن الله .

 

Mohamed Abdelhamid Ibrahim